پاک فوج کے شعبہ تعلقات عامہ کے مطابق خیبرپختونخوا میں سیکیورٹی فورسز نے دو الگ الگ کارروائیوں میں بھارتی سرپرستی میں فتنہ الخوارج سے تعلق رکھنے والے 10 دہشت گردوں کو ہلاک کر دیا۔
آئی ایس پی آر کے مطابق پہلی کارروائی 6 اگست کو جنوبی وزیرستان کے علاقے اعظم ورسک میں کی گئی جہاں خوارج نے سیکیورٹی فورسز کی چیک پوسٹوں پر حملہ کیا۔ جوابی کارروائی میں 8 دہشت گرد مارے گئے۔ دوسری کارروائی ضلع دیر میں کی گئی جہاں مزید 2 خوارج ہلاک ہوئے جبکہ ان کے قبضے سے اسلحہ اور گولہ بارود بھی برآمد کیا گیا۔
آئی ایس پی آر کا کہنا ہے کہ ہلاک ہونے والے دہشت گرد علاقے میں متعدد کارروائیوں میں ملوث تھے اور وژن "عزمِ استحکام" کے تحت انسداد دہشت گردی کی کارروائیاں جاری رہیں گی۔
دوسری جانب وزیراعظم شہباز شریف نے جنوبی وزیرستان اور دیر میں کامیاب آپریشنز پر سیکیورٹی فورسز کو خراجِ تحسین پیش کرتے ہوئے کہا کہ قوم اپنے جوانوں کی پیشہ ورانہ صلاحیتوں اور قربانیوں پر فخر کرتی ہے۔ انہوں نے عزم ظاہر کیا کہ دہشت گردی کے مکمل خاتمے تک کارروائیاں جاری رہیں گی اور حکومت و قوم سیکیورٹی فورسز کے شانہ بشانہ کھڑی ہے۔