صوبائی وزیرِ داخلہ ضیاء الحسن لنجار نے کہا ہے کہ سندھ حکومت نے میر رضا کیس کی تحقیقات کے لیے جوڈیشل کمیشن کی تشکیل کا فیصلہ مقتول کے اہل خانہ کی درخواست پر فی الوقت مؤخر کردیا ہے۔
وزیرِ داخلہ سندھ نے بتایا کہ میئر کراچی اور پاکستان پیپلز پارٹی کے رہنما بیرسٹر مرتضیٰ وہاب نے میر رضا کی والدہ سے کیس کی تحقیقات کے حوالے سے گفتگو کی ہے۔ انہوں نے وضاحت کی کہ سندھ حکومت نے ابتدائی طور پر تحقیقات میں مکمل شفافیت اور غمزدہ خاندان کے خدشات کو دور کرنے کے لیے عدالتی انکوائری شروع کرنے کا فیصلہ کیا تھا۔ تاہم، نئی پولیس تحقیقاتی ٹیم کی تشکیل کے بعد، مقتول کے اہل خانہ نے اس پر اپنے مکمل اعتماد کا اظہار کیا ہے اور درخواست کی ہے کہ یہی ٹیم اپنی تحقیقات جاری رکھے۔
ضیاء الحسن لنجار کا کہنا تھا کہ اہل خانہ کی جانب سے نئی پولیس ٹیم پر اعتماد کے اظہار اور انہی سے تحقیقات کرانے کی درخواست کے پیشِ نظر حکومت نے فی الوقت جوڈیشل کمیشن کی تشکیل کا عمل روکنے کا فیصلہ کیا ہے۔
سندھ کے وزیرِ داخلہ نے اس عزم کا اعادہ کیا کہ صوبائی حکومت شفاف اور غیر جانبدارانہ تحقیقات کو یقینی بنانے کے لیے مکمل طور پر پرعزم ہے اور کیس میں انصاف کے تمام تقاضے پورے کیے جائیں گے۔