عراق کے کردستان ریجن کے وزیراعظم مسرور بارزانی کے دفتر اور دیگر اہم مقامات پر دو ڈرون حملوں کا واقعہ پیش آیا ہے، جس پر کرد حکام نے ایران کو ذمہ دار قرار دیا ہے۔
کردستان وزیراعظم آفس کے ترجمان کے مطابق دونوں ڈرون حملے ایرانی سرزمین سے کیے گئے۔ حملوں میں اربیل صوبے کے ضلع پیرمام میں وزیراعظم مسرور بارزانی کے نجی دفتر اور کردستان ریجن کی سیکیورٹی ایجنسی کے ڈائریکٹر کی رہائش گاہ کو نشانہ بنایا گیا۔
مسرور بارزانی نے حملوں کی مذمت کرتے ہوئے کہا کہ ایرانی حملے خطے کی سلامتی کے لیے خطرہ ہیں اور عراق میں کردستان ریجن کے دفتر کو نشانہ بنانا قابل مذمت اقدام ہے۔
کرد حکام کا کہنا ہے کہ حملوں کے ذمہ داروں کو اس کے نتائج کی مکمل ذمہ داری اٹھانا ہوگی۔
حکام کے مطابق ڈرون حملوں کے نتیجے میں کسی جانی یا مالی نقصان کی اطلاع نہیں ملی۔