برطانوی وزیر خارجہ ایڈ ملی بینڈ نے مقبوضہ مغربی کنارے میں بڑے یہودی آبادکاری منصوبے پر اسرائیل کے خلاف شدید احتجاج کرتے ہوئے منصوبہ فوری طور پر روکنے کا مطالبہ کیا ہے۔
برطانوی وزیر خارجہ کے مطابق اسرائیل کی جانب سے متنازع آبادکاری منصوبے کیلیے ٹینڈر جاری کیے جانے پر اسرائیلی ناظم الامور کو طلب کرکے برطانیہ کا احتجاج ریکارڈ کرایا گیا۔ انہوں نے منصوبے کو ناقابل قبول اور تباہ کن قرار دیتے ہوئے کہا کہ اس سے فلسطینی علاقوں کے درمیان رابطہ متاثر اور مغربی کنارے کو مشرقی بیت المقدس سے الگ ہونے کا خطرہ پیدا ہوسکتا ہے۔
ایڈ ملی بینڈ نے کہا کہ اسرائیلی وزیر خارجہ کے سامنے بھی معاملہ اٹھایا گیا ہے اور مطالبہ کیا گیا ہے کہ غیر قانونی آبادکاری یونٹس کا ٹینڈر واپس لیا جائے، منصوبہ فوری طور پر روکا جائے اور آبادکاری میں مزید توسیع بند کی جائے۔
انہوں نے الزام عائد کیا کہ اسرائیلی حکومت نے اپنے وعدے کے برخلاف منصوبے کا ٹینڈر جاری کیا جبکہ اسے عدالت میں چیلنج کرنے والے افراد کو بھی پیش رفت سے آگاہ نہیں کیا گیا۔
برطانوی وزیر خارجہ نے کہا کہ اسرائیلی آبادکاروں کا تشدد اور نئی آبادکاری فلسطینیوں کی مشکلات میں اضافہ کررہی ہے، برطانیہ دو ریاستی حل کو تباہ ہوتے ہوئے خاموشی سے قبول نہیں کرے گا۔