وزیر داخلہ بلوچستان میر ضیاء اللہ لانگو نے قومی اسمبلی میں اپوزیشن لیڈر محمود خان اچکزئی کے بیان پر ردعمل دیتے ہوئے کہا ہے کہ دہشت گردوں کا نام لینے سے گریز کرنا خوف کی علامت ہے، جبکہ اس طرزِ عمل سے عوام کو اصل حقائق سے دور رکھا جا رہا ہے۔
ضیاء اللہ لانگو کا کہنا تھا کہ سرانان حملے کی ذمہ داری متعلقہ دہشت گرد تنظیم خود قبول کر چکی ہے، اس کے باوجود محمود خان اچکزئی دہشت گردوں کا نام لینے کے بجائے سارا معاملہ حکومت کے کھاتے میں ڈال رہے ہیں۔
وزیر داخلہ بلوچستان نے الزام عائد کیا کہ بعض سیاسی رہنما اپنی جان کے خوف کے باعث دہشت گرد تنظیموں کا نام لینے سے گریز کرتے ہیں اور عوام کے سامنے حقائق بیان کرنے کے بجائے ابہام پیدا کرتے ہیں۔
انہوں نے کہا کہ کچھ سیاسی رہنما شارٹ کٹ اختیار کرتے ہوئے ہر واقعے کی ذمہ داری حکومت پر عائد کردیتے ہیں، حالانکہ ایک حقیقی سیاسی قیادت کو مشکل حالات میں عوام کے درمیان موجود رہ کر انہیں درست حقائق سے آگاہ کرنا چاہیے۔
میر ضیاء اللہ لانگو نے کہا کہ بلوچستان کے عوام سے اصل حقائق چھپا کر تمام تر ذمہ داری حکومت پر ڈالنا درست طرزِ عمل نہیں۔ ان کے بقول پشتون عوام کو حقیقت بتانے کے بجائے غلط سمت دکھانا پشتون دوستی نہیں بلکہ ان کے ساتھ ناانصافی کے مترادف ہے۔