ایرانی پارلیمنٹ نے امریکی صدر ڈونلڈ ٹرمپ پر پارلیمنٹ کے اسپیکر محمد باقر قالیباف کے بیان کو توڑ مروڑ کر پیش کرنے اور ایران کے خلاف فوجی ناکامی چھپانے کے لیے گمراہ کن اطلاعات پھیلانے کا الزام عائد کیا ہے۔
ایرانی پارلیمنٹ کے میڈیا سینٹر سے جاری بیان میں کہا گیا ہے کہ امریکا کے صدر اپنی فوجی ناکامیوں پر پردہ ڈالنے اور امریکی عوام اور عالمی رائے عامہ کی نظر میں اپنی ساکھ بحال کرنے کے لیے جھوٹی خبریں گھڑنے اور میڈیا کھیل کھیلنے کی کوشش کر رہے ہیں۔
بیان میں موقف اختیار کیا گیا کہ ٹرمپ نے قالیباف کے ریمارکس کو غلط انداز میں پیش کرکے اسے ایران کی فوجی شکست کے اعتراف کے طور پر پیش کرنے کی کوشش کی۔
پارلیمنٹ کے مطابق اسپیکر قالیباف نے کہا تھا کہ ایران نے فوجی جنگ میں امریکا کو شکست دی ہے، تاہم امریکا اب ذہنی اور اقتصادی جنگ کا راستہ اختیار کر رہا ہے۔