پیپلز پارٹی کی رہنما اور رکن قومی اسمبلی شرمیلا فاروقی نے پمز اسپتال میں آتشزدگی کے واقعے میں 15 بچوں کی اموات پر وفاقی وزیر صحت مصطفیٰ کمال سے مستعفی ہونے کا مطالبہ کردیا۔
شرمیلا فاروقی نے اپنے ردعمل میں کہا کہ وزیراعظم نے وفاقی سیکریٹری صحت کو عہدے سے ہٹا دیا، لیکن سوال یہ ہے کہ کیا احتساب صرف ایک افسر تک محدود رہے گا؟
انہوں نے کہا کہ اگر ملک میں سیاسی اور اخلاقی ذمہ داری موجود ہے تو وفاقی وزیر صحت مصطفیٰ کمال کو فوری استعفیٰ دینا چاہیے۔
پیپلز پارٹی رہنما کا کہنا تھا کہ اسلام آباد کے وفاقی اسپتال وزارت صحت کی براہِ راست ذمہ داری ہیں، جب اپنے زیر انتظام اسپتالوں میں بنیادی انتظام، نگرانی اور مریضوں کی حفاظت یقینی نہ بنائی جاسکے تو وزارت صحت چلانے کا جواز باقی نہیں رہتا۔
شرمیلا فاروقی نے کہا کہ سیکریٹری کو قربانی کا بکرا بنا کر وزیر کو بری الذمہ نہیں کیا جاسکتا، اختیار وزیر کا ہے تو جوابدہی بھی وزیر کی ہونی چاہیے۔