اسلام آباد کے پمز اسپتال کی انتظامیہ نے گنجائش ختم ہونے کے باعث میٹرنٹی کے نئے کیسز لینے سے معذرت کرلی ہے۔
اسپتال کے ایگزیکٹو ڈائریکٹر رانا عمران سکندر نے تصدیق کرتے ہوئے بتایا کہ گنجائش سے زائد مریض رکھنے کی صلاحیت نہ ہونے کی وجہ سے یہ قدم اٹھایا گیا ہے۔
انہوں نے وضاحت کی کہ اسپتال کی بچوں کی نرسری میں آگ لگنے سے 15 بیڈز مکمل طور پر جل گئے، جس کے بعد 50 بیڈز کی نرسری میں اب صرف 35 بیڈز باقی بچے ہیں۔
ان کا مزید کہنا تھا کہ مریضوں اور بچوں کو راولپنڈی اور اسلام آباد کے دیگر اسپتالوں میں منتقل کیا جائے گا۔ اس حوالے سے متعلقہ اسپتالوں کو باقاعدہ خطوط ارسال کر دیے گئے ہیں جبکہ کچھ بچوں کو پولی کلینک اسپتال منتقل بھی کر دیا گیا ہے۔