کراچی کے علاقے ڈیفنس، خیابانِ بخاری کے ایک اپارٹمنٹ میں دو خواتین کے درمیان جھگڑے اور مبینہ تشدد کی ویڈیو سوشل میڈیا پر وائرل ہوگئی۔
متاثرہ خاتون نور العین نے مبینہ تشدد کے بعد ویڈیو بنا کر سوشل میڈیا پر شیئر کی، جبکہ متاثرہ خاندان کی جانب سے تھانہ درخشاں میں درخواست بھی جمع کرادی گئی ہے۔
ڈی آئی جی ساؤتھ اسد رضا کے مطابق واقعے کی انکوائری میرٹ پر کی جائے گی۔ ان کا کہنا تھا کہ متاثرہ بہن بھائی اپنی والدہ کے ساتھ اپارٹمنٹ میں رہائش پذیر تھے، جہاں تین افراد کے درمیان پہلے تلخ کلامی ہوئی جو بعد ازاں جھگڑے میں تبدیل ہوگئی۔
سی سی ٹی وی فوٹیج میں ایک خاتون کو دوسری خاتون پر تشدد کرتے دیکھا جاسکتا ہے، جبکہ اس کے ہاتھ میں ورزش کے لیے استعمال ہونے والا لوہے کا ڈمبل بھی موجود ہے۔ فوٹیج میں ایک پولیس اہلکار کو متاثرہ خاتون کے ساتھ موجود شخص کو دھکے دیتے ہوئے بھی دیکھا گیا۔