وزیر اعلیٰ سندھ سید مراد علی شاہ نے کراچی کے علاقے کورنگی میں نامعلوم افراد کی جانب سے حالات خراب کرنے کی کوشش کا سخت نوٹس لیتے ہوئے آئی جی پولیس کو واقعے کی فوری تحقیقات اور مکمل رپورٹ پیش کرنے کا حکم دیا ہے۔
وزیر اعلیٰ نے ہدایت کی ہے کہ شرپسند عناصر کے خلاف بلاامتیاز کارروائی کی جائے اور شہر کا امن خراب کرنے کی کسی کو اجازت نہ دی جائے۔
سید مراد علی شاہ نے پولیس کو کورنگی اور اس کے اطراف کے علاقوں میں امن و امان کی صورتحال قابو میں رکھنے، گشت کو مزید مؤثر بنانے اور بالخصوص کورنگی کراسنگ پر موٹر سائیکلوں کو آگ لگانے میں ملوث افراد کو فوری گرفتار کرنے کی تاکید کی ہے۔
ترجمان وزیر اعلیٰ سندھ کے مطابق وزیر اعلیٰ کا کہنا تھا کہ شہریوں کے تحفظ اور امن و امان پر کوئی سمجھوتہ نہیں کیا جائے گا، اس لیے پولیس عوام کے جان و مال کے تحفظ کو ہر صورت یقینی بنائے۔