سابق وزیراعظم عمران خان کی سابقہ اہلیہ اور فلم پروڈیوسر جمائما گولڈ اسمتھ نے بزنس مین کیمرون او ریلی سے اپنی دوسری شادی کی باضابطہ تصدیق کردی۔
جمائما نے انسٹاگرام پر شادی کی تصاویر شیئر کرتے ہوئے بتایا کہ شادی 12 ستمبر 2026 کو ہوئی۔ تصاویر میں ان کے دونوں بیٹے اور دوست بھی ان کے ہمراہ دکھائی دیے۔ جمائما نے شادی کا دن خاص اور خوشیوں بھرا بنانے والے تمام افراد کا شکریہ ادا کیا۔
اس سے قبل برطانوی اخبار ڈیلی میل نے دعویٰ کیا تھا کہ 52 سالہ جمائما نے 62 سالہ کیمرون او ریلی سے شادی کرلی ہے۔
آئرش نژاد آسٹریلوی کیمرون او ریلی معروف کاروباری شخصیت سر انتھونی او ریلی کے بیٹے ہیں۔ وہ نجی سرمایہ کاری کے شعبے سے وابستہ رہے ہیں جبکہ جمائما اور کیمرون کی ملاقات فلم اور ڈاکیومنٹریز کے کام کے دوران ہوئی، جہاں دونوں کی دوستی بعد ازاں رومانوی تعلق میں تبدیل ہوئی۔