سعودی عرب پر حوثی ملیشیا کی جانب سے میزائل حملے کی کوشش ناکام بنا دی گئی، سعودی دفاعی نظام نے حوثیوں کی جانب سے داغے گئے 6 بیلسٹک میزائلوں کو فضا میں ہی تباہ کردیا۔
سعودی اتحاد کے ترجمان کے مطابق حوثیوں نے سعودی عرب کے اہم شہروں طائف اور ینبع کو بیلسٹک میزائلوں سے نشانہ بنانے کی کوشش کی، تاہم سعودی عرب کے دفاعی نظام نے بروقت کارروائی کرتے ہوئے تمام میزائلوں کو کامیابی سے روک کر تباہ کردیا۔
ترجمان کے مطابق حوثیوں کی جانب سے میزائل حملہ سعودی عرب کے شہری علاقوں کو نشانہ بنانے کی کوشش تھی، تاہم جدید دفاعی نظام کی مؤثر کارروائی کے باعث میزائل اپنے اہداف تک پہنچنے میں ناکام رہے۔
حملے کے خدشے کے پیش نظر سعودی شہری دفاع نے مکہ مکرمہ، طائف، جدہ، ینبع اور تبوک کے علاقوں میں شہریوں کے لیے خطرے کا الرٹ جاری کیا تھا۔ شہریوں کو محتاط رہنے، محفوظ مقامات پر رہنے اور متعلقہ حکام کی جانب سے جاری کردہ حفاظتی ہدایات پر عمل کرنے کی ہدایت کی گئی تھی۔
سعودی حکام کی جانب سے جاری کردہ الرٹ کے بعد شہریوں میں تشویش پیدا ہوئی، تاہم صورتحال کا جائزہ لینے اور دفاعی اقدامات مکمل کیے جانے کے بعد حکام نے اعلان کیا کہ ممکنہ خطرہ ٹل گیا ہے اور شہری معمول کی سرگرمیاں جاری رکھ سکتے ہیں۔
سعودی حکام نے شہریوں پر زور دیا ہے کہ وہ ہنگامی صورتحال سے متعلق سرکاری اعلانات اور ہدایات پر نظر رکھیں اور غیر مصدقہ اطلاعات پر توجہ نہ دیں۔
سعودی عرب کی جانب سے حوثیوں کے میزائل حملوں کو روکنے کا یہ اقدام خطے میں جاری کشیدگی کے تناظر میں سامنے آیا ہے، جہاں حوثی گروپ ماضی میں بھی سعودی علاقوں کو میزائل اور ڈرون حملوں سے نشانہ بنانے کی کوششیں کر چکا ہے۔