یمن کے حوثیوں نے سعودی عرب کی سرکاری آئل کمپنی آرامکو کی ایک ریفائنری کو نشانہ بنانے کا دعویٰ کیا ہے، تاہم سعودی حکام یا آرامکو کی جانب سے حملے کی فوری طور پر تصدیق نہیں کی گئی۔
خبر رساں ادارے کے مطابق حوثیوں کا کہنا ہے کہ آرامکو کی تنصیب پر حملہ سعودی عرب کی جانب سے یمن کے دارالحکومت صنعا اور دیگر علاقوں میں کیے جانے والے حملوں کے ردعمل میں کیا گیا۔
سعودی سول ڈیفنس کے مطابق صوبہ عسیر کے گورنریٹ احد رفیدہ میں حوثیوں کی جانب سے داغا گیا ایک بیلسٹک میزائل فضا میں تباہ کیا گیا، تاہم میزائل کے ملبے کی زد میں آکر ایک شخص زخمی ہوگیا۔
سعودی حکام کے مطابق جنوبی شہر نجران میں بھی حوثیوں کے ایک پروجیکٹائل حملے کے نتیجے میں ایک اسکول کو نقصان پہنچا۔
دوسری جانب ایک عینی شاہد نے خبر رساں ادارے رائٹرز کو بتایا کہ ہفتے کے روز ریاض میں آرامکو کی ایک تنصیب کے قریب دھوئیں کے بادل بلند ہوتے دیکھے گئے، جس کے بعد فائر فائٹرز نے موقع پر پہنچ کر آگ پر قابو پانے کی کوشش کی۔
تاہم سعودی حکام نے آرامکو کی کسی تنصیب کو نشانہ بنائے جانے کی باضابطہ تصدیق نہیں کی، جبکہ آرامکو کی جانب سے بھی واقعے پر فوری طور پر کوئی بیان جاری نہیں کیا گیا۔
حوثیوں نے گزشتہ ہفتے بھی سعودی عرب کے شہر ینبع میں آرامکو کی تنصیبات کو میزائلوں اور ڈرونز سے نشانہ بنانے کا دعویٰ کیا تھا۔ اس وقت سعودی عرب کا کہنا تھا کہ اس نے طائف اور ینبع کی جانب داغے گئے 6 بیلسٹک میزائلوں کو روک لیا ہے، تاہم آرامکو کی تنصیبات کو پہنچنے والے ممکنہ نقصان کی تفصیلات فراہم نہیں کی گئی تھیں۔