وزیراعظم شہباز شریف نے کراچی اور مالدیپ کے درمیان براہِ راست پروازیں شروع کرنے کی ہدایت کردی، جبکہ پاکستان اور مالدیپ کے درمیان دوطرفہ تجارت کا حجم ایک کروڑ 30 لاکھ ڈالر سے بڑھا کر 20 کروڑ ڈالر تک لے جانے کا اعلان کیا گیا ہے۔
پاکستان مالدیپ بزنس فورم میں وزیراعظم شہباز شریف اور مالدیپ کے صدر ڈاکٹر محمد معیزو سمیت اعلیٰ حکام نے شرکت کی، جہاں دونوں ممالک کے درمیان دوطرفہ تعاون کے معاہدوں پر دستخط کیے گئے۔
تقریب سے خطاب کرتے ہوئے وزیراعظم شہباز شریف نے کہا کہ پاکستان اور مالدیپ کے درمیان میری ٹائم شپنگ کے شعبے میں تعاون ضروری ہے۔
مالدیپ کے صدر ڈاکٹر محمد معیزو نے پاکستانی کمپنیوں کو اپنے ملک میں جدید ٹیکنالوجی متعارف کرانے کی دعوت دیتے ہوئے کہا کہ دونوں ممالک کے درمیان اقتصادی تعاون کے وسیع مواقع موجود ہیں۔ انہوں نے تعلیم، سیاحت اور دیگر شعبوں میں سرمایہ کاری کی اہمیت پر بھی زور دیا۔