عالمی سطح پر جغرافیائی سیاسی کشیدگی اور تیل کی قیمتوں میں اضافے کے خدشات کے باعث پاکستان اسٹاک ایکسچینج میں جمعہ کو بھی فروخت کا دباؤ برقرار رہا، جس کے نتیجے میں کاروبار کے ابتدائی گھنٹوں میں بینچ مارک کے ایس ای 100 انڈیکس 600 سے زائد پوائنٹس گرگیا۔
کاروبار کے دوران صبح 9 بج کر 50 منٹ پر انڈیکس 625.74 پوائنٹس یا 0.38 فیصد کمی کے بعد 163,298.57 پوائنٹس پر آگیا۔
آٹو موبائل، سیمنٹ، کمرشل بینکوں، تیل و گیس کی تلاش کرنے والی کمپنیوں، آئل مارکیٹنگ کمپنیوں، بجلی پیدا کرنے والی کمپنیوں اور ریفائنریز سمیت اہم شعبوں میں فروخت دیکھی گئی۔ اے آر ایل، حبکو، ماری پیٹرولیم، پی پی ایل، پول، ایم سی بی، ایم ای بی ایل، این بی پی اور یو بی ایل کے حصص بھی منفی زون میں رہے۔
واضح رہے کہ جمعرات کو بھی اسٹاک مارکیٹ میں مندی رہی تھی اور کے ایس ای 100 انڈیکس 2,006.67 پوائنٹس یا 1.21 فیصد کمی کے بعد 163,924.32 پوائنٹس پر بند ہوا تھا۔
مارکیٹ میں مسلسل جغرافیائی سیاسی غیر یقینی صورتحال، عالمی منڈی میں تیل کی بڑھتی ہوئی قیمتوں اور مثبت محرکات کی کمی کو سرمایہ کاروں کے اعتماد میں کمی کی اہم وجوہات قرار دیا جا رہا ہے۔