اعلیٰ ثانوی تعلیمی بورڈ کراچی نے انٹرمیڈیٹ حصہ اول کے سالانہ امتحانات 2026 کے نتائج کا اعلان کردیا ہے۔ نتائج پری میڈیکل، سائنس جنرل، کامرس، آرٹس، خصوصی امیدواروں اور ہوم اکنامکس سمیت تمام متعلقہ گروپس کے جاری کیے گئے ہیں۔
ناظم امتحانات زرینہ راشد کے مطابق پری میڈیکل گروپ میں 11,966، سائنس جنرل میں 15,036، کامرس ریگولر میں 9,332، کامرس پرائیویٹ میں 628، آرٹس ریگولر میں 3,748، آرٹس پرائیویٹ میں 692، خصوصی امیدواروں میں 58 اور ہوم اکنامکس میں 41 امیدوار تمام پرچوں میں کامیاب ہوئے۔
بورڈ کے مطابق رواں سال سائنس گروپس کے اختیاری مضامین کی جانچ جدید او ایم آر، ای مارکنگ اور ای اسسمنٹ سسٹم کے تحت کی گئی۔ انٹرمیڈیٹ حصہ اول کے امتحانات میں نیا گریڈنگ سسٹم بھی نافذ کیا گیا ہے، جس کے تحت کسی پرچے میں 40 فیصد سے کم نمبر لینے والے امیدوار کو ان گریڈڈ قرار دیا جائے گا اور وہ اس پرچے میں کامیاب تصور نہیں ہوگا۔