پنجاب کے سرکاری میڈیکل اور ڈینٹل کالجز میں دیگر صوبوں کے لیے مختص نشستوں پر داخلوں کے لیے یونیورسٹی آف ہیلتھ سائنسز (یو ایچ ایس) 26 اکتوبر سے آن لائن درخواستیں وصول کرے گی۔
داخلوں کے تحت ایم بی بی ایس کی 214 اور بی ڈی ایس کی 38 نشستیں دیگر صوبوں اور علاقوں کے طلبہ کے لیے مختص کی گئی ہیں۔ متعلقہ صوبوں اور علاقوں کے امیدوار ان مخصوص نشستوں پر براہِ راست آن لائن درخواستیں جمع کرا سکیں گے۔
مختص نشستوں کی تفصیلات کے مطابق اسلام آباد کے لیے ایم بی بی ایس کی 26 اور بی ڈی ایس کی 4 نشستیں رکھی گئی ہیں، جبکہ آزاد کشمیر کے طلبہ کے لیے ایم بی بی ایس کی 36 اور بی ڈی ایس کی 3 نشستیں مختص ہیں۔
اسی طرح گلگت بلتستان کے لیے ایم بی بی ایس کی 55 اور بی ڈی ایس کی 5 نشستیں، بلوچستان کے لیے ایم بی بی ایس کی 48 اور بی ڈی ایس کی 10 نشستیں مختص کی گئی ہیں۔ سابق فاٹا کے طلبہ کے لیے ایم بی بی ایس کی 49 اور بی ڈی ایس کی 16 نشستیں رکھی گئی ہیں۔
داخلے کے لیے امیدواروں کا متعلقہ ڈومیسائل رکھنا اور میڈیکل اینڈ ڈینٹل کالج ایڈمیشن ٹیسٹ (ایم ڈی کیٹ) پاس کرنا لازمی ہوگا۔
داخلوں کے لیے منتخب ہونے والے امیدواروں کے کوائف اور اہلیت کی تصدیق متعلقہ صوبائی اور علاقائی حکومتیں کریں گی۔ طلبہ کو ہدایت کی گئی ہے کہ وہ درخواست جمع کراتے وقت مقررہ شرائط اور اہلیت کے معیار کو مدنظر رکھیں۔