ضلع خیبر کے علاقے قاضیانو کلے میں ایک ہی خاندان کے 7 کمسن بچے پراسرار طور پر جاں بحق ہوگئے، جبکہ 2 بچوں کو بے ہوشی کی حالت میں پشاور منتقل کرکے طبی امداد دی جا رہی ہے۔
پولیس کے مطابق متاثرہ خاندان کے بچوں کو طبی امداد کے لیے پشاور منتقل کیا جا رہا تھا کہ دوران سفر 5 بچے دم توڑ گئے۔ جاں بحق ہونے والے بچوں کی عمریں 5 سال سے کم بتائی گئی ہیں، جن میں 3 بچیاں اور 2 بچے شامل ہیں۔
پولیس کے مطابق 2 متاثرہ بچوں کو حیات آباد میڈیکل کمپلیکس منتقل کیا گیا ہے، جہاں ان کا علاج جاری ہے۔ بچوں کی پراسرار اموات کی وجوہات تاحال معلوم نہیں ہوسکی ہیں۔
ڈی ایچ او خیبر ڈاکٹر رفیق حیات کے مطابق بچوں کی اموات کی اصل وجہ جاننے کے لیے تحقیقات شروع کردی گئی ہیں، جبکہ میڈیکل ٹیمیں متاثرہ علاقے میں روانہ کردی گئی ہیں۔
ان کا کہنا ہے کہ طبی ٹیمیں علاقے سے خوراک اور پانی کے نمونے حاصل کریں گی، جن کے تجزیے کے بعد بچوں کی اموات کی حتمی وجہ سامنے آسکے گی۔