عالمی ٹیکنالوجی کمپنی اینویڈیا (NVIDIA) کے شریک بانی اور چیف ایگزیکٹو جینسن ہوانگ کو دو مبینہ تعلقات کے انکشاف کے بعد عہدے سے ہٹائے جانے کے امکانات پیدا ہوگئے ہیں، جس پر غور کرنے کے لیے کمپنی کے بورڈ آف ڈائریکٹرز نے ہنگامی اجلاس طلب کرلیا ہے۔
1993 میں قائم ہونے والی دنیا کی اس سب سے بڑی مصنوعی ذہانت (اے آئی) اور سیمی کنڈکٹر چپ ساز کمپنی کے سربراہ کا مستقبل ان اسکینڈلز کے منظر عام پر آنے کے بعد غیر یقینی ہوگیا ہے۔ اس صورتحال کے باعث کمپنی کے حصص کی قیمتوں میں شدید مندی دیکھی گئی ہے اور اینویڈیا کی مجموعی مارکیٹ ویلیو میں 600 ارب ڈالرز سے زائد کی کمی واقع ہوچکی ہے، جبکہ چار ہزار ارب ڈالرز سے زائد مالیت کی اس کمپنی میں ان کی جگہ لینے کے لیے تاحال کسی متبادل نام کا تعین نہیں کیا جا سکا۔
تنازع کا آغاز اس وقت ہوا جب یہ رپورٹس سامنے آئیں کہ جینسن ہوانگ کے ایلیس ہوانگ نامی ایک مبینہ چینی جاسوس کاروباری خاتون کے ساتھ تعلقات رہے ہیں، جس کے نتیجے میں چینی کمپنیوں کو کم از کم ساڑھے سات ارب ڈالر مالیت کی جدید چپس کی فراہمی میں مدد ملی۔
اطلاعات کے مطابق ایلیس ہوانگ نے اپنے شوہر اور بہن کے ساتھ مل کر چین اور سنگاپور میں کمپنیوں کا جال بچھایا، جس کا مرکز جون 2023 میں قائم ہونے والی کمپنی 'شنگھائی سینچری لیٹونگ' تھی، جس نے چند ہی ماہ میں اینویڈیا کا 'پریفرڈ کلاؤڈ پارٹنر' بن کر چپس تک ترجیحی رسائی حاصل کر لی تھی۔ جینسن ہوانگ اس تعلق کی تصدیق کر چکے ہیں اور اس معاملے پر تحقیقات جاری ہیں۔
اس تحقیقاتی عمل کے دوران ہی امریکی اخبار نیویارک ٹائمز نے انکشاف کیا ہے کہ جینسن ہوانگ کے اینویڈیا کے شعبہ صحت کی نائب صدر کمبرلی پاؤل کے ساتھ بھی تعلقات رہے ہیں۔ چونکہ کمبرلی پاؤل براہ راست چیف ایگزیکٹو کے ماتحت کام کرتی تھیں، اس لیے یہ عمل کمپنی کے ضابطہ اخلاق کی سنگین خلاف ورزی تصور کیا جا رہا ہے۔ اس نئی رپورٹ پر تاحال کمپنی یا کمبرلی پاؤل کی جانب سے کوئی باضابطہ موقف سامنے نہیں آیا، تاہم وال اسٹریٹ جرنل کے مطابق اس دوسرے انکشاف کے بعد بورڈ آف ڈائریکٹرز ان کی برطرفی پر سنجیدگی سے غور کر رہا ہے۔
دوسری جانب حقائق مخفی رکھنے کے الزام میں اینویڈیا کے شیئر ہولڈرز نے کمپنی اور جینسن ہوانگ کے خلاف عدالت سے رجوع کرتے ہوئے مقدمہ دائر کر دیا ہے۔ اس تمام تر بحران کے دوران امریکی صدر ڈونلڈ ٹرمپ نے جینسن ہوانگ کی حمایت کرتے ہوئے کہا ہے کہ اگرچہ ان کی ان الزامات پر ہوانگ سے بات نہیں ہوئی، تاہم وہ ایک بہترین انسان ہیں جنہوں نے شاندار کام کیا ہے اور امید ہے کہ تمام معاملات بہتر ہوجائیں گے۔