کنڈیارو اور سکرنڈ کے درمیان قومی شاہراہ پر ہالانی کے قریب 36 ٹن ایل پی جی گیس سے بھرا باؤزر الٹ گیا۔
ترجمان موٹروے پولیس کے مطابق گیس باؤزر گوادر سے لاہور جا رہا تھا کہ ڈائیورژن ایریا میں حادثے کا شکار ہوگیا۔
ابتدائی معلومات کے مطابق حادثہ ممنوعہ مقام پر اوورٹیکنگ اور ڈرائیور کی غفلت کے باعث پیش آیا، تاہم خوش قسمتی سے باؤزر الٹنے کے بعد گیس لیکج نہیں ہوئی۔
اطلاع ملتے ہی موٹروے پولیس نے فوری طور پر موقع پر پہنچ کر علاقے کو گھیرے میں لے لیا اور حفاظتی اقدامات یقینی بنائے، جبکہ ریسکیو 1122، فائر بریگیڈ اور مقامی پولیس کو بھی طلب کرلیا گیا ہے۔
موٹروے پولیس کے افسران جائے حادثہ پر موجود ہیں اور امدادی کارروائیاں جاری ہیں۔