امریکی نائب صدر جے ڈی وینس نے کہا ہے کہ صدر ڈونلڈ ٹرمپ ایران کے ساتھ طویل اور نہ ختم ہونے والی جنگ نہیں ہونے دیں گے امریکا اپنے طے شدہ مقاصد حاصل کرے گا لیکن تنازع کو غیر معینہ مدت تک جاری نہیں رکھا جائے گا۔
برطانوی اخبار دی انڈیپنڈنٹ کے مطابق جے ڈی وینس کا یہ بیان ایسے وقت میں سامنے آیا ہے جب صدر ٹرمپ نے مشرقِ وسطیٰ میں امریکا کا تیسرا طیارہ بردار بحری جہاز بھیج دیا ہے۔
فاکس نیوز کو انٹرویو دیتے ہوئے وینس نے کہا کہ امریکا گزشتہ 47 برس سے ایران کے ساتھ مختلف تنازعات میں ملوث رہا ہے، تاہم موجودہ کشیدگی کو طویل جنگ میں تبدیل کرنے کا کوئی ارادہ نہیں۔
انہوں نے واضح کیا کہ امریکی انتظامیہ اپنے اہداف کے حصول کے لیے کام کرے گی، لیکن امریکا کسی ایسی جنگ میں نہیں الجھے گا جس کا کوئی اختتام نہ ہو۔
واضح رہے کہ ٹرمپ گزشتہ کئی ماہ سے ایران کے خلاف مزید حملوں کے اشارے بھی دیتے رہے ہیں، جبکہ بعض مواقع پر تنازع ختم ہونے کے دعوے بھی کرچکے ہیں۔ دوسری جانب جے ڈی وینس کا کہنا ہے کہ امریکا غیر معینہ مدت کی جنگ کا راستہ اختیار نہیں کرے گا۔