یہ سننے میں کافی عجیب ہے کیوں کہ کراچی اور برف باری کا دور دور تک کوئی تعلق نہیں لیکن جی ہاں یہ بالکل سچ بھی ہے کہ اب کراچی والے بھی برف کا مزہ لے سکیں گے۔
پی اے ایف میوزیم میں 4 جنوری 2020 سے ایک ایسے ونڈر لینڈ کا انعقاد کیا جا رہا ہے جس میں برف کی سلائیڈیں اور مجسمے بھی بنائے گئے ہیں۔ ونڈر لینڈ کا درجہ حرارت منفی 10 ڈگری سینٹی گریڈ ہوگا۔
شہر قائد میں رہنے والوں کے لیے یہ ایک بڑی دلچسپ تفریح متعارف کروائی گئی ہے، لوگ اس بات سے خوش ہیں کہ اب برف باری دیکھنے کسی دوسرے شہر نہیں جانا پڑے گا۔ یہ ونڈر لینڈ ایک ماہ تک لوگوں کے لیئے کھلا رہے گا۔
اس برفیلے ونڈر لینڈ کا داخلہ ٹکٹ 1500 روپے ہوگا جس میں دستانے اور جیکٹ ونڈر لینڈ انتظامیہ کی جانب سے لوگوں کو مہیا کیے جائیں گے۔ اس کے علاوہ لوگوں کو ہدایت کی گئی ہے کہ گرم کپڑے پہن کے آئیں۔