متحدہ عرب امارات سے دو روز قبل سوشل میڈیا پر ایک ویڈیو وائرل ہوئی جِس میں ڈرائیور ہائی وے پر مخالف سمت میں تیز رفتار گاڑی چلانے کے کرتب دِکھا رہا ہے۔
تفصیلات کے مطابق ریاست ام القوین میں پولیس نے لاپرواہی برتنے اور لوگوں کی زندگیاں خطرے میں ڈالنے پر ڈرائیور کو گرفتار کر لیا۔
مذکورہ ویڈیو ہائی وے پر ایک مسافر نے بنائی جِسے اس نے سماجی رابطے کی ویب سائٹ ٹوئٹر پر اپ لوڈ کیا۔ ویڈیو میں واضح دیکھا جاسکتا ہے کہ گاڑی پر سوار شخص مخالف سمت میں تیز رفتاری سے گاڑیوں کے بیچ سے گزر رہا ہے۔
ویڈیو میں گاڑی کی نمبر پلیٹ اور ڈرائیور کا چہرہ صاف واضح تھا تاہم پولیس نے فوری طور پر کارروائی کرتے ہوئے ملزم کو گرفتار کر کے گاڑی ضبط کر لی اور اس کے خلاف مزید تفتیش شروع کردی ہے۔