متحدہ عرب امارات کے ولی عہد حمدان بن محمد بن راشد سوشل میڈیا پر کافی متحرک ہیں اور اپنے سماجی کاموں کی وجہ سے اکثر خبروں میں بھی رہتے ہیں لیکن حال ہی میں ان کی ایک ویڈیو وائرل ہوئی جس میں ان کا ایک نیا انداز نظر آیا۔
سوشل میڈیا ویب سائٹ ٹوئٹر پر مثبت سرگرمیوں، ماحولیات اور دیگر کھیلوں میں رغبت کے باعث شہرت رکھنے والے دبئی کے ولی عہد شہزادہ حمدان بن محمد بن راشد کی ایک ویڈیو کو بہت پذیرائی حاصل ہوئی جس میں وہ ایک اونٹ کو آواز دیتے ہوئے نظر آتے ہیں، اونٹ شہزادے کی آواز سنتے ہی ان کی گاڑی کے قریب آتا ہے اور آکر والہانہ انداز میں اپنی انسیت کا اظہار بھی کرتا ہے۔ ایک وقت کے لئے ایسا لگا کہ اونٹ شہزادے کا منہ دبوچ لے گا مگر ایسا کچھ نہ ہوا۔
سوشل میڈیا صارفین کے لیے شہزادے کی مصروفیات کو دیکھنا اور انہیں سراہنا نئی بات نہیں لیکن جانوروں کے ساتھ اچھا سلوک، رحم دلی اور محبت کے جذبات رکھنے پر صارفین نے ان کی خوب تعریف کی ۔ صارفین کا کہنا تھا کہ جانوروں کو بھی توجہ اور پیار کی ضرورت ہوتی ہے اور حقیقت تو یہ ہے کہ یہ جانور انسانوں سے زیادہ وفادار ثابت ہوتے ہیں۔