وہ جگہیں جہاں عوام کا جم غفیر ہوتا ہے وہاں سے کورونا وائرس کو جلد از جلد کس طرح ختم کیا جائے یہ ایک اہم سوال ہے۔
اسی حوالے سے برطانوی سائنس دانوں نے ایک نئی تجویز پیش کی ہے۔
سائنس دانوں کا کہنا ہے کہ سیڑھیوں کے جنگلے، شاپنگ ٹرالیوں اور دروازوں کے ہینڈلز پر تانبے یعنی کاپر کا کور چڑھا لینا چاہیے، کیوں کہ یہ کورونا وائرس کو صرف 4 گھنٹوں میں مار دیتا ہے۔
تحقیق کے مطابق تانبے میں اینٹی بیکٹریل خصوصیات ہوتی ہیں جن کی وجہ سے وائرس محض چار گھنٹوں کے اندر ختم ہو جاتا ہے، آلودہ اور گندی سطحوں کو چھونے اور پھر اپنے چہرے پر ہاتھ لگانے سے لوگ اس بیماری میں مبتلا ہو سکتے ہیں۔
یونیورسٹی آف ساؤتھ مپٹن کے سینئر مائیکرو بائیولوجسٹ ولیم کیول نے اس حوالے سے تجویز دی کہ پبلک ٹرانسپورٹ پر ہینڈریلز، شاپنگ ٹرالیوں اور دروازوں کی کنڈیوں حتیٰ کہ جم کے سامان کو بھی تانبے سے کور کر لینا چاہیے۔
اب سوال یہ پیدا ہوتا ہے کہ کاپر سے کورونا کس طرح ختم کیا جا سکتا ہے؟
سائنس دانوں نے اس کا جواب دیتے ہوئے کہا کہ جب کورونا وائرس کاپر پر لگتا ہے تو دھات کے برقیاتی طور پر چارج شدہ ایٹمز وائرس کی ساخت جو وائرس کی حفاظت کرتی ہے، اس پر حملہ کر دیتے ہیں۔ اس کے بعد تانبا خلیے پر حملہ آور ہوتا ہے اور وائرس کا ڈی این اے تباہ کر دیتا ہے، جس سے کورونا وائرس مکمل طور پر ختم ہو جاتا ہے۔