کراچی میں شدید گرمی کے بعد مون سون اب اپنے جوبن پر ہے، شہر بھر میں طوفانی بارشوں کا سلسلہ جاری ہے جبکہ ان بارشوں کے نتیجے میں کئی لوگ اپنی جان سے بھی جا چکے ہیں۔
سوشل میڈیا پر چند ویڈیوز وائرل ہو رہی ہیں، جس میں دیکھا جاسکتا ہے کہ بارش کتنی تیز تھی۔ ایک سڑک پر تو بل بورڈ ہی گر گیا جس نے وہاں موجود لوگوں کو شدید خوفزدہ کیا۔
چند ویڈیوز ملاحظہ کیجیے۔
اب سوال یہ پیدا ہوتا ہے کہ اگر آپ گھر سے باہر موجود ہیں تو ان طوفانی بارشوں سے کس طرح محفوظ رہا جا سکتا ہے؟
٭سب سے اہم بات، اگر بارشوں کے موسم میں محکمہ موسمیات نے موسلا دھار بارش کی پیشن گوئی کی ہے تو گھر سے اس وقت تک نہ نکلیں، جب تک کوئی مجبوری نہ ہو۔
٭اگر آپ گھر سے باہر یعنی اسکول، کالج، یونیورسٹی، آفس، یا اسپتال میں ہیں اور بارش شروع ہو چکی ہے تو جس جگہ موجود ہیں، اس وقت تک وہیں رہیں جب تک بارش رک نہ جائے۔ بارش کے رکنے پر ہی وہیں نکلیں تو زیادہ بہتر ہے۔
٭اگر آپ سڑک پر موجود ہیں اور بارش شروع ہو چکی ہے تو فوراً کوئی پکی جگہ یا سایہ دار جگہ تلاش کر کے وہاں بارش رکنے کا انتظار کریں۔
٭جتنا ممکن ہو بارش میں گاڑی ڈرائیو نہ کریں، اگر مجبوری ہو تو گاڑی آہستہ چلائیں۔
٭اگر آپ گھر سے باہر ہیں اور ہلکی بارش شروع ہوئی ہے، تو فوراً اپنے گھر کے لیے نکل جائیں تاکہ طوفانی بارش کے شروع ہونے سے قبل آپ اپنے گھر پہنچ جائیں۔