امریکی صدارتی انتخاب کے نتائج کا سلسلہ جاری ہے، غیر ملکی خبر رساں اداروں کے مطابق کامیابی کے لیے درکار 270 میں سے ڈیموکریٹ پارٹی سے تعلق رکھنے والے جو بائیڈن اب تک 264 الیکٹورل ووٹس حاصل کرنے میں کامیاب رہے جبکہ امریکی صدر ڈونلڈ ٹرمپ کو 214 الیکٹورل ووٹس ہی حاصل ہو سکے ہیں تاہم اب بھی کئی ریاستوں کے نتائج آنا باقی ہیں۔
دنیا بھر میں امریکی انتخابات کا چرچہ ہے ،کہیں ٹرمپ کے حامی ان کی جیت کے لئے بے صبر اور دعاگو نظر آتے ہیں تو کہیں جوبائیڈن کے حامی ان کی جیت کے لئے پرجوش ہیں ایسے میں ٹرمپ انتظامیہ میں ان کی روحانی مشیر کے عہدے پر فائز پالا وائٹ کی انوکھی دعاؤں کی ویڈیو انٹرنیٹ پر کافی وائرل ہورہی ہے۔
دعائیہ کلمات میں پالا وائٹ پرجوش انداز میں اپنے راہنما کی جیت کی نوید سناتے ہوئے کہہ رہی ہیں کہ انہیں جیت کی آواز سنائی دے رہی ہے، انہوں نے کہا کہ ' افریقہ سے فرشتوں کو روانہ کردیا گیا ہے، وہ یہاں پہنچ رہے ہیں، جنوبی امریکا سے بھی فرشتے یہاں پہنچ رہے ہیں'، مجھے فتح کی گونج سنائی دے رہی ہے۔
اپنے دعائیہ کلمات میں پالا وائٹ کا مزید کہنا تھا کہ کامیابی حاصل کرنے تک ہمیں کوشش کرنی ہے۔