تفصیلات کے مطابق چین میں بنائے گئے مقبول لیکن نہایت خطرناک سیاحتی مقام پر ایک رونگٹے کھڑے کر دینے والا حادثہ پیش آیا، اونچائی پر بنے شیشے کے پل پر ایک سیاح اس وقت پھنس گیا جب اس کے شیشے اچانک ٹوٹ گئے۔
شمال مشرقی چین کے صوبہ جیلین میں اس جھولتے پل کا شیشے سے بنا فرش اچانک چکنا چور ہوگیا۔ لونگ جیانگ نامی شہر میں 100 میٹر بلندی پر واقع اس پل پر سیاح نیچے کا نظارہ دیکھ رہا تھا جب اچانک تند و تیز ہوا چلنا شروع ہوگئی۔
ڈیڑھ سو کلومیٹر فی گھنٹہ کی رفتار سے چلنے والی تند و تیز ہوا کے نتیجے میں پل کے متعدد گلاس پینل ٹوٹ گئے اور سیاح درمیان میں پھنس گیا۔ اس سیاح کو فائر فائٹرز، پولیس اور مقامی حکام نے ڈیڑھ گھنٹے کی جدوجہد کے بعد وہاں سے نکالا۔
چینی سوشل میڈیا پر شیئر کی گئی تصاویر میں ایک شخص کو دکھایا گیا ہے جو پل کی سائیڈ کو پکڑے کھڑا ہے جبکہ اس کے ارگرد شیشے کے پینل ٹوٹ چکے ہیں اور وہاں سے خلا نظر آرہے ہیں۔
حادثے میں نامعلوم سیاح کو کوئی نقصان نہیں پہنچا ۔
چینی سوشل میڈیا پر لوگوں نے اس واقعے کو بھیانک خواب قرار دیا۔ ایک شخص نے لکھا کہ حالیہ برسوں میں متعدد گلاس برج تعمیر ہوئے ہیں اور سیاحوں میں مقبول بھی ہیں، مگر ہم کس طرح ان کے محفوظ ہونے کی یقین دہانی کروا سکتے ہیں؟