اکثر ہماری زمین پر خلا سے کچھ ایسی چیزیں گرنے کے واقعات پیش آتے ہیں جو سائنس کے لئے تو دلچسپی کا باعث ہوتے ہیں لیکن عام شہری ان چیزوں سے پریشان ہوجاتے ہیں۔ ایسا ہی کچھ ہوا بھارت کی ریاست گجرات کے علاقے بھالج، کھمبھولاج اور رام پورہ کے رہائشیوں کے ساتھ جن کے گھروں کے پاس اچانک دھاتی گیندیں برسنے لگیں۔
شہری گیندوں کے گرنے کی زوردار آواز سے گھبرا اٹھے اور عجیب و غریب دکھنے والی سلور گیندوں کو دیکھ کر خوفزدہ ہوگئے۔ علاقے کے لوگوں نے پولیس سے رابطہ کیا جس کے بعد پولیس نے گیندوں کو ٹیسٹ کے لئے لیب بھیجا۔
5 کلو وزنی دھاتی گیند
بھارتی میڈیا کے مطابق سب سے بڑی گیند کا وزن 5 کلو یے اور تین مختلف علاقوں میں ایک ہی وقت میں ایک جیسی گیندیں گری ہیں البتہ کسی قسم کا جانی نقصان نہیں ہوا۔
ہارورڈ سمتھسونین سنٹر فار ایسٹرو فزکس کے ماہر فلکیات جوناتھن میک ڈویل کے مطابق یہ کسی راکٹ کا ملبہ ہوسکتا ہے البتہ اس حوالے سے تحقیقات جاری ہیں کہ یہ دھاتی گیندیں راکٹ کے ملبے کے ہیں یا نہیں۔