سابق وزیراعظم شاہد خاقان عباسی نے کہا ہے کہ جب بھی مشکل فیصلے کریں گے عوام پر بوجھ پڑے گا۔
اپنے بیان میں انہوں نے کہا کہ ہم چاہتے ہیں ایسا فورم ہو جہاں عوام کے مسائل کی بات کی جائے، پارلیمنٹ میں عوامی مفاد کی بات نہیں ہورہی،معیشت کی بدحالی انتہا کو پہنچ چکی ہے۔
مسلم لیگ ن کے رہنما نے کہا کہ ہمارے سیاستدانوں کی ناکامی بھی انتہا کو پہنچ چکی ہے،ایسے فورم کامقصد عوامی مسائل کو اجاگر کرنا ہے،بدقسمتی سے سیاستدانوں کا اختلاف دشمنی میں تبدیل ہوگیا ہے۔
ان کا کہنا تھا کہ بلوچستان کے صوبے کو سب سے خوشحال ہونا چاہیے تھا جہاں سب سے زیادہ وسائل موجود ہیں۔
انہوں نے کہا کہ اگرمسائل کے حل کاسوچتے ہیں تو نیب اور اسٹیبلشمنٹ خوف ہے، تمام سیاسی مسائل اور بحرانوں کاحل آئین میں موجود ہے۔سیاست سے پہلے ملک کا سوچنے کی ضرورت ہے،ملک ہوگا تو سیاست اوراقتدار بھی رہے گا۔
لیگی رہنما نے مزید کہا کہ معیشت چلانے کے حوالے سے ہم نے غیرذمہ داری کامظاہرہ کیا،غیرمعمولی حالات کامقابلہ غیرمعمولی عمل سے کرناپڑے گا،ملک میں انصاف کانظام مفلوج ہوچکا ہے،ہمیں متحد ہوکر چیلنجز کامقابلہ کرنا ہوگا۔
ان کا کہنا تھا کہ ایک دوسرے پر الزامات لگانے کی بجائے مسائل کاحل نکالنے کی ضرورت ہے۔