جہاز میں بچوں کی پیدائش کے واقعات تو آپ نے بہت سنے ہوں گے لیکن اب خبر سامنے آئی ہے کہ چلتی ہوئی ٹرین میں ایک بچے کی پیدائش ہوئی ہے۔ تفصیلات کے مطابق فرانس کے شہر پیرس سے Strasbourg جانے والی تیز رفتار ٹرین کے سفر کے دوران بچے کی پیدائش ہوئی۔ حاملہ خاتون کو سفر کے آغاز میں ہی تکلیف ہونا شروع ہوئی تھی۔ خاتون نے عملے کو بتایا تو ٹرین کو مشرقی فرانس کے اسٹیشن پر روک دیا گیا اور تمام مسافروں نے خاتون کی ڈیلیویری کا انتظار کیا۔

تقریباً 80 منٹ کے بعد بیٹے کی پیدائش ہوئی۔ خاتون کے مطابق بچے کی پیدائش وقت سے پہلے ہوئی جس کے بعد ماں اور بچے کو قریبی اسپتال منتقل کیا گیا۔ اب ماں اور بچہ دونوں صحت مند ہیں۔

ٹرین میں سفر کے دوران اگر بچے کی پیدائش ہوجائے تو عملہ فوری طور پر کیا کرتا ہے؟

چونکہ فرانس میں جدید ٹیکنالوجی سے مزین ٹرین ہے جس میں ایک چھوٹا سا میڈیکل روم بھی موجو دہوتا ہے، اس جگہ فوری ضرورت کی تمام تر ادویات رکھی جاتی ہیں۔ ان کا اپنے کنٹرول روم سے رابطہ بھی ہوتا ہے اور فوری ایمرجنسی کی صورت میں ایک ڈاکٹر بھی موجود ہوتا ہے۔ لہٰذا اس بچے کی پیدائش میں بھی اسی ڈاکٹر اور عملے نے مدد کی۔ ٹرین میں پیدائش کی خوشی میں اس بچے کا ٹکٹ ہمیشہ کے لیے اس ٹرین میں فری کر دیا گیا ہے۔