اسلام آباد میں رہائشی سوسائٹی میں موجود تیندوے کو ’کمرے تک محدود کر دیا گیا، بے ہوش کرنے کی کوشش کی جا رہی ہے‘

پاکستان کے دارالحکومت اسلام آباد کی رہائشی سوسائٹی ڈی ایچ اے کے فیز 2 میں داخل ہونے والے ایک تیندوے پر ’بالآخر قابو پا لیا گیا ہے۔‘

اسلام آباد وائلڈ لائف ویلفیئر بورڈ کی ڈائریکٹر رینا سعید علی نے بی بی سی سے بات کرتے ہوئے تصدیق کی ہے کہ ’تیندوے کو اس وقت ایک کمرے تک محدود کیا گیا ہے جہاں اسے مکمل طور پر بے ہوش کیا جا رہا ہے اور اس حوالے سے مکمل تفصیل کچھ دیر بعد دی جائے گی۔‘

سوشل میڈیا پر دوپہر سے ہی ایسی ویڈیوز سامنے آنے لگی تھیں جن میں ایک تیندوے کو ایک شخص پر حملہ کرنے کے بعد ایک گھر کی دیوار پھلانگتے دیکھا جا سکتا ہے۔

ڈی ایچ اے فیز 2 کے ایک رہائشی وسیم چوہدری نے بتایا کہ یہ دوپہر چار بجے کے قریب سیکٹر ڈی میں داخل ہوا ہے جو سہالا پل کے قریب ہی ایک کونے میں واقع ہے۔

مقامی رہائشیوں کی جانب سے سوسائٹی کے گروپ میں شیئر کی جانے والی ویڈیوز دیکھتے ہی دیکھتے سوشل میڈیا پر وائرل ہوئیں جن میں لوگوں کو بڑی تعداد میں ان گھروں کے آس پاس کھڑے دیکھا جا سکتا ہے اور ان ویڈیوز میں اس دوران تیندوے پر فائر کرنے کی آوازیں بھی آتی ہیں۔

بی بی سی سے بات کرتے ہوئے تیندوے کو ریسکیو کرنے کے مشن کا حصہ اسلام آباد وائلڈ لائف کے ایک اہلکار نے بتایا تھا کہ ’تیندوا ایک گھر کے تہہ خانے میں موجود ہے اور اس نے مجھ سمیت کئی لوگوں کو زخمی بھی کیا ہے لیکن ہمیں امید ہے کہ ہم اسے زندہ ریسکیو کر لیں گے۔‘

جب ان سے پوچھا گیا کہ ان کے خیال میں تیندوا رہائشی علاقے میں کہاں سے آیا ہے تو انھوں نے کہا کہ ’یہ پالتو جانور معلوم ہوتا ہے۔‘ تاہم اس وقت موقع پر اس کا مالک موجود نہیں ہے۔

محکمہ وائلڈ لائف کے اہلکار کا کہنا تھا کہ عام طور پر اس طرح کے موقعوں پر مالک سامنے نہیں آتے کیونکہ یہ جانور گھروں میں رکھنا ایک غیر قانونی عمل ہے۔ انھیں یہ مشن چھوڑ کر ہسپتال روانہ ہونا پڑا، تاہم ان کے مطابق انھیں معمولی چوٹیں آئی ہیں۔

https://twitter.com/WildlifeBoard/status/1626221484300726280?s=20

محکمہ وائلڈ لائف کے اہلکار نے بتایا کہ تاحال ایسے آثار نہیں ہیں کہ تیندوے کو گولی لگی ہے لیکن اس بارے میں اس کو ریسکیو کرنے کے بعد ہی وثوق سے کچھ کہا جا سکتا ہے۔

خیال رہے کہ اسلام آباد وائلڈ لائف ویلفیئر بورڈ کی جانب سے کی گئی ٹویٹس میں بتایا گیا تھا کہ اس ریسکیو آپریشن میں اسلام آباد وائلڈ لائف کے ہمراہ پنجاب وائلڈ لائف سمیت ریسکیو کے اہلکار بھی موجود ہیں۔

ان ٹویٹس میں موجود ویڈیوز میں دیکھا جا سکتا ہے کہ وائلڈ لائف کے اہلکار علاقے کو کارڈن آف کرنے کی کوشش کر رہے ہیں اور تیندوے کو ایک مخصوص علاقے تک محدود کرنے کی کوشش کر رہے ہیں۔

اس بارے میں آج دوپہر ہی اسلام آباد کے اسسٹنٹ کمشنر رورل زخرف فدا ملک نے ڈی ایچ اے اسلام آباد اور گرد و نواح کے رہائشیوں کو گھروں میں رہنے کی ہدایت کی تھی۔

ڈی ایچ اے فیز 2 میں موجود رہائشیوں کی جانب سے جہاں سوشل میڈیا پر ویڈیوز شیئر کی گئی ہیں وہیں کچھ رہائشیوں موقع سے بی بی سی کے ساتھ ویڈیوز بھی شیئر کی ہیں جن میں ایک پریشان کن مناظر دیکھے جا سکتے ہیں۔

جن گھروں کے درمیان تیندوا منڈلا رہا ہے وہاں قریب ہی خاصا رش لگا ہوا اور لوگ یہ تماشہ دیکھنے کے لیے وہاں کھڑے ہوئے ہیں۔

علاقے کی ایک رہائشی نے بی بی سی کو بتایا کہ ’اس علاقے میں لوگ کم از کم چند گھنٹے پہلے تک حفاظتی اقدامات نہیں اٹھا رہے تھے، اور ان گھروں کے باہر گھوم رہے تھے جہاں تیندوا موجود ہے۔‘

ان کی جانب سے شیئر کی گئی ویڈیو میں اس گلی کے پاس بڑی تعداد میں گاڑیاں کھڑی دیکھیجا سکتی ہیں۔

ڈی ایچ اے فیز 2 کے واٹس ایپ گروپ اور سوشل میڈیا پرشیئر ہونے والی ایک اور ویڈیو میں تیندوے کو ایک شخص اور ایک نوعمر لڑکی پر حملہ کرتے دیکھا جا سکتا ہے جو بظاہر ان گھروں کے آس پاس اس کے منتظر کھڑے دکھائی دیتے ہیں۔

سوشل میڈیا پر شروعات میں زخمی ہونے والے شخص کی تصاویر بھی شیئر کی جا رہی ہیں تاہم ان کی تصدیق نہیں کی جا سکی ہے۔