یہ تو بینظیر کی طرح بولتی ہیں اور ۔۔ آصفہ بھٹو نے جیالوں کو بی بی کی یاد دلادی، ویڈیو وائرل

پیپلزپارٹی کے چیئرمین بلاول بھٹو زرداری کی ہمشیرہ آصفہ بھٹو نے پی پی کے جیالوں کو بینظیر بھٹو کی یاد دلا دی، ویڈیو سوشل میڈیا پر وائرل ہوگئی۔

آصفہ بھٹو نے کل کشمیر کے ضلع باغ میں ہونے والے ضمنی انتخابات سے متعلق سوشل میڈیا پر پیغام جاری کیا ، سوشل میڈیا صارفین کا کہنا ہے کہ آصفہ بھٹو ہو بہو اپنی والدہ کی طرح بولتی ہیں جبکہ کچھ کا کہنا ہے کہ اُنہیں آصفہ بھٹو کی ویڈیو دیکھ کر ایسا لگا کہ جیسے بی بی قوم سے خطاب کر رہی ہیں۔

3 فروری 1993 کو لندن میں پیدا ہونے والی آصفہ بھٹو نے آکسفورڈ بروکس یونیورسٹی سے سیاست اور سوشیالوجی میں ڈگری حاصل کی، انہوں نے یونیورسٹی کالج لندن سے گلوبل ہیلتھ میں ماسٹر کی ڈگری بھی حاصل کی۔

1994 میں ان کی والدہ بے نظیر بھٹو نے پولیو سے بچاؤ کے حفاظتی ٹیکوں کی ایک بڑی مہم شروع کی،آصفہ بھٹو زرداری پہلی پاکستانی بچی تھیں جنھوں نے سب سے پہلے پولیو سے بچاؤ کے قطرے پلائے۔

سیاسی ماحول میں پرورش پانے والی آصفہ بھٹو سیاسی سرگرمیوں میں بھی حصہ لیتی ہیں اور باقاعدگی سے سیاسی امور پر تبصرے کرتی ہیں۔گزشتہ سال ملتان میں پی ڈی ایم کے جلسے سے خطاب کے بعد انہوں نے اپنے سیاسی کا آغاز کیا تھا۔

اب 8 جون کو کشمیر کے ضلع باغ میں ہونیوالے ضمنی الیکشن کے دوران بھی وہ انتخابی مہم میں شریک ہیں اور کل پیپلزپارٹی کو ووٹ دینے کیلئے ویڈیو پیغام جاری کیا ہے۔