پاک روس تعلقات میں تاریخ رقم کرتے ہوئے پہلا روسی خام تیل بردار جہاز کراچی پہنچ گیا، 50 ہزار ٹن کی دوسری کھیپ آئندہ ہفتے آئیگی۔
کراچی پہنچنے والے 183میٹر لمبے روسی جہاز پیور پوائنٹ میں 45ہزار میٹرک ٹن تیل لدا ہے اور سمندری طوفان سے قبل جہاز کراچی پہنچنے میں کامیاب ہوگیا۔
پاکستان کی تاریخ میں روس سے آنے والا تیل کا یہ پہلا جہاز ہے جو روسی فیڈریشن اور پاکستان کے درمیان نئے تعلقات کی شروعات ہے۔روسی خام تیل کا جہاز کراچی پورٹ کی آئل پیئر 2پر تیل ترسیل کرے گا، روسی جہاز آنے کے بعد ملک میں تیل کی قیمتیں کم ہونے کی امید ہے۔
اس حوالے سے وزیراعظم شہباز شریف کاکہنا ہے کہ قوم کے ساتھ اپنے وعدوں میں سے ایک اور وعدہ ہم نے پورا کر دیا ہے۔
خوشی کے ساتھ اعلان کر رہا ہوں کہ روس سے رعایتی قیمت پر خام تیل سے بھرا بحری جہاز کراچی پہنچ گیا ہے اور کل سے تیل کی ترسیل شروع ہوجائے گی۔
ہم ملک کی خوشحالی، معاشی ترقی، انرجی سکیورٹی اور مناسب داموں پر توانائی کی فراہمی کےلئے مناسب وقت پر مناسب قدم اٹھا رہے ہیں۔
میں ان تمام لوگوں کو خراج تحسین پیش کرتا ہوں جو اس قومی کاوش اور روس سے پاکستان تیل لانے کے وعدے کو عملی تعبیر دینے کا حصہ رہے۔
ذرائع کا کہنا ہے کہ خال تیل کا پہلا جہاز پہنچنے پر پیٹرولیم قیمتوں میں کمی کا امکان کم ہے تاہم آئندہ ہفتے دوسری کھیپ پہنچنے پر ملک میں پیٹرولیم مصنوعات کی قیمتوں میں کمی ہوسکتی ہے۔