“ابا کو فلیٹ کی بہت فکر تھی۔ ٹینشن کی وجہ سے انہیں شوگر اور بلڈ پریشر کی بیماری بھی تھی لیکن خود سے زیادہ انہیں اپنے فلیٹ کی فکر کھائی جاتی تھی جس کی وجہ سے وہ چیزیں بھولنے بھی لگے تھے ۔“
یہ کہنا ہے وسیم انصاری کے بیٹے کا جو اپنے والد کی وفات پر دکھ کا شکار ہیں۔ واضح رہے کہ سابق صدر پرویز مشرف کی پیروڈی کرنے والے اور ان کے ہم شکل آرٹسٹ وسیم انصاری کا گزشتہ شب اچانک انتقال ہوگیا ہے۔
وسیم انصاری جیو نیوز کے پروگرام “ہم سب امید سے ہیں“ میں پرویز مشرف کی پیروڈی سے مقبول ہوئے تھے۔ ان کے بیٹے نے والد کی اچانک موت کے بارے میں بات کرتے ہوئے بتایا کہ “والد بیمار نہیں تھے آج دوپہر یوٹیلٹی بل جمع کرانے گھر کے قریبی بینک گئے جہاں سے واپسی میں وہ اچانک گر پڑے اور فوری طور پر انتقال کرگئے۔ ہمارے فلیٹ پر قبضہ ہوا ہم کرائے کے گھر میں آگئے، میں اکیلا کمانے والا ہوں والد فلیٹ پر مقدمے کی وجہ سے پریشان رہتے تھے۔“
اطلاعات کے مطابق مرحوم آرٹسٹ کی نماز جنازہ ان کی رہائش گاہ کے قریب جامع مسجد مریم میں ادا کی گئی جس میں چیئرمین آرٹس فاؤنڈیشن محمد فیصل ندیم اور ساتھی فنکاروں سمیت عزیز و اقارب نے شرکت کی۔ اس کے بعد وسیم انصاری کو گلستان جوہر کے قبرستان میں سپرد خاک کردیا گیا۔