کینیڈا کے وزیراعظم جسٹن ٹروڈو اور ان کی اہلیہ صوفی گریگوائر ٹروڈو نے بدھ کو اعلان کیا کہ وہ شادی کے 18 برس بعد علیحدگی اختیار کر رہے ہیں۔
امریکی خبر رساں ایجنسی اے پی کے مطابق دونوں نے انسٹاگرام پوسٹ پر اپنے بیان میں بتایا کہ انہوں نے یہ فیصلہ ’کئی بامعنی اور مشکل گفت وشنید کے بعد کیا ہے۔‘وزیراعظم آفس کی جانب سے جاری کیے گئے ایک بیان میں کہا گیا ہے کہ دونوں نے علیحدگی کے ایک قانونی معاہدے پر دستخط کردیے ہیں۔اس جوڑے کی شادی 2005 میں ہوئی تھی اور ان کے تین بچے ہیں۔زاویئر کی عمر 15 سال، ایلا گریس کی 14 جبکہ ہیڈریئن کی عمر 9 سال ہے۔وزیراعظم آفس کے مطابق ’وہ ایک قریبی فیملی کی طرح ہیں اور صوفی اور وزیراعظم کی توجہ اپنے بچوں کے محفوظ، محبت بھرے اور سازگار ماحول میں پرورش پر موکوز ہے۔‘’فیملی آئندہ ہفتے شروع ہونے والی چھٹیوں پر اکٹھی ہوگی۔‘ وزیراعظم کے آفس کی جانب سے ان کی نجی زندگی کا احترام کرنے کی درخواست کی گئی ہے۔‘جسٹس ٹروڈو کینیڈا کے دوسرے وزیراعظم ہیں جنہوں نے اپنی وزارتِ عظمٰی کے دوران اہلیہ سے علیحدگی اختیار کرنے کا اعلان کیا ہے۔اس سے قبل ان کے والد پیئر ٹروڈو 1979 میں اہلیہ مارگریٹ سے علیحدہ ہوئے تھے اور دونوں کی 1984 میں طلاق ہوگئی تھی۔