مرد تو سگریٹ بھی پیتے ہیں لیکن ۔۔ آپ جانتے ہیں مردوں سے زیادہ خواتین کینسر کا شکار کیوں ہوتی ہیں؟

کینسرکسی بھی جاندار کو لاحق ہونے والے ایسے امراض کا مجموعہ ہے جنکا تعلق بنیادی طور پر خلیات سے ہوتا ہے، جب جسم کے کچھ خلیات معمول کی رفتار سے اپنی نشو و نما جاری نہ رکھ پائیں اور تیزرفتاری سے اپنی تعداد اور جسامت میں اضافہ کرنا شروع کر دیں تو سرطان پیدا ہوتا ہے، جسم کے کسی عضو کے خلیات کا بے لگام ہوجانا ہی سرطان بناتا ہے۔

دنیا میں اس وقت کینسر تیزی سے بڑھتا جارہا ہے اور تشویش کی بات تو یہ ہے کہ خواتین مردوں کے مقابلے میں پھیپڑوں کے کینسر کی زیادہ شکار ہورہی ہیں اگرچہ انہوں نے کبھی سگریٹ پی ہی نہیں۔

امریکی ادارہ صحت کے مطابق جیسا کہ تمباکو نوشی کو پھیپھڑوں کے کینسر کی بنیادی وجہ کے طور پر دیکھا جاتا ہے تاہم اکثر خواتین کی موت کا ذمہ دار چھاتی کا کینسر نہیں بلکہ پھیپھڑوں کا کینسر ہے اور اندازوں سے پتہ چلتا ہے کہ یہ کینسر امریکہ میں روزانہ تقریباً 164 خواتین کو ہلاک کرتا ہے۔

ماہرین کا کہنا ہے کہ پچھلی دو دہائیوں میں سگریٹ استعمال کرنے والی خواتین کی شرح میں نمایاں کمی آئی ہے۔ تاہم کینسر میں مبتلا خواتین کی تعداد بڑھ رہی ہے، خاص طور پر ان میں جنہوں نے کبھی سگریٹ نوشی بھی نہیں کی۔

سائنسدان اس بات کا جواب دینے کی کوشش کررہے ہیں کہ کیوں زیادہ نوجوان اور درمیانی عمر کی خواتین مردوں کے مقابلے میں پھیپھڑوں کے کینسر کا شکار ہو رہی ہیں جو کہ چھاتی اور رحم کے کینسر سے زیادہ خواتین کی ہلاکت کا ذمہ دار ہے۔