سعودی عرب میں ایسے کاغذ ، برتن یا سامان پر جسے عام طور پر لوگ استعمال کرکے ضائع کردیا جاتا ہے اس پر اللہ کانام اورسونے کے زیورات وآرائشی اشیاء پر قرآنی آیات تحریر کرنے پر پابندی عائدکردی گئی ہے۔
سعودی عرب کے مفتی اعلیٰ کا کہنا ہے کہ قرآنی آیات انسانوں کی ہدایت کے لیے نازل کی گئی ہیں اس مقصد کے سوا کسی اور کام میں استعمال کرنے کی اجازت نہیں ہے اس لئے کسی بھی صورت میں قرآنی آیات کی بے حرمتی کی اجازت نہیں دی جاسکتی۔
میڈیا رپورٹس کے مطابق سعودی وزیر داخلہ نے تاکید کی ہے کہ اللہ کا نام ایسے کسی بھی کاغذ، برتن یا سامان پر تحریر نہ کیا جائے جسے عام طور پر لوگ استعمال کرکے ضائع کردیتے ہیں۔
عرب میڈیا نے تصدیق کی ہے کہ سونے کے زیورات اور آرائشی اشیاء پر قرآنی آیات تحریر کرنے کے حوالے سے پابندی سعودی عرب کے مفتی اعلیٰ اور وزیر داخلہ کی جاری کردہ ہدایات پر لگائی گئی ہے۔
یاد رہے کہ کاغذ،سونے کے زیورات، برتن اور آرائشی سامان پر اللہ کے نام اور قرآنی آیات لکھنے کی وجہ سے بے حرمتی کا خدشہ رہتا ہے اس لئے سعودی حکومت نے یہ اقدام اٹھایا ہے۔