اکثر انسان راتوں رات امیر ہونے کا سوچتے ہیں اور اس کیلئے مختلف حربے میں آزماتے ہیں لیکن ان کی قسمت کا بند دروازہ نہیں کھلتا اور کچھ لوگ ایسے بھی ہوتے ہیں جو حقیقت میں راتوں رات کروڑ پتی بن جاتے ہیں جیسا کہ امریکا کہ اس شخص کے ساتھ ہوا جس نے مہینوں پہلے ایک لاٹری کا ٹکٹ لیا اور وہ گم ہوگیا تاہم جب واپس ملا تو مالک کو کروڑوں کا مالک بنادیا۔
امریکی ریاست میساچوسیٹس کے خلیل سوسا کے ملازم کو گھر میں مہینوں پہلے کھویا ہوا لاٹری کا ٹکٹ ملا جس نے خلیل سوسا کو 10 لاکھ ڈالر کی رقم جتوادی اور خلیل انعامی رقم سے اپنے دوست کی مدد اور خیرات کرنے کا ارادہ رکھتے ہیں۔
خلیل نے میساچوسیٹس اسٹیٹ لاٹری کے حکام کو بتایا کہ انہوں نے میڈفورڈ کی سیلم اسٹریٹ سے ڈیڑھ کروڑ ڈالر کی انعامی رقم والا اسکریچ آف ٹکٹ خریدا تھا لیکن نتائج جاننے سے پہلے ہی وہ ٹکٹ ان سے کھو گیا تھا۔ خلیل سوسا کے ملازم کو یہ ٹکٹ مہینوں بعد ایک مرتبان سے ملا جس نے ان کو 10 لاکھ ڈالر کا مالک بنا دیا ہے۔
خلیل سوسا کا کہنا ہے کہ مجھے بالکل بھی امید نہیں تھی کہ میرا انعام نکل سکتا ہے اور ٹکٹ گم ہونے کے بعد تو میں نے بالکل ہی امید چھوڑی دی تھی لیکن جب ملازم نے ٹکٹ ڈھونڈھ کر دیا اور اس پر انعام نکلا تو مجھے یقین نہیں آیا۔
ان کا کہنا ہے کہ اس رقم سے میں اپنے ایک دوست کی مدد کرنا چاہتا ہوں اور خیرات بھی کرنا چاہتا ہوں تاکہ اس رقم کا درست استعمال ہوسکے اور ضرورتمندوں کی مدد ہوسکے۔