اسلام آباد ۔27دسمبر (اے پی پی):وزارت توانائی، پاور ڈویژن کے مطابق حالیہ لوڈ شیڈنگ 25 اور 26 دسمبر کو ملتان ریجن اور دیگر ڈسکوز کے متعدد گرڈ سٹیشنوں کے ٹرپ ہونے کی وجہ سے ہوئی۔ دھند کے باعث 132kv، 220kv اور 500kv کے گرڈ اسٹیشن ٹرپ کر گئے۔ اسی دوران ہائیڈل جنریشن میں کمی آئی جس سے نظام میں توازن پیدا کرنے میں رکاوٹیں پیدا ہوئیں۔ این ٹی ڈی سی سسٹم کو ان موسمی حالات اور کم ہائیڈل جنریشن کی وجہ سے ایک مشکل وقت کا سامنا ہے۔
نظام کو کام کرتے رہنے کے لیے لوڈ مینجمنٹ کے ذریعے پیداوار میں موجودہ کمی سے نمٹا جا رہا ہے۔وزارت توانائی، پاور ڈویژن کے ترجمان کے مطابق کنال کلوژر کی وجہ سے ہائیڈل کی شارٹ فال تقریباً 1600MW ہے اور LNG کی کم دستیابی کی وجہ سے 700MW ہے۔ پاور ڈویژن اس شارٹ فال کو کم کرنے کی کوشش کر رہا ہے اور 800 میگاواٹ بجلی پیدا کرنے کے لیے اور ایل این جی کی کمی سے نمٹنے کے لیے فرنس آئل کا استعمال کیا جا رہا ہے۔ لوڈشیڈنگ سسٹم کی رکاوٹوں کی وجہ سے ہوئی اور سسٹم کو سنبھالنے کی کوششیں جاری ہیں۔