اقوام متحدہ ۔17جنوری (اے پی پی):غزہ میں 22 لاکھ افراد قحط کے خطرے سے دوچار ہیں۔اقوام متحدہ کی نیوز ویب سائٹ کے مطابق ادارے کے دفتر برائے رابطہ انسانی امور نے غزہ میں خوراک کی موجودہ قلت کی وجہ سے پیدا ہونے والے بحران کے حوالے سے ایک بیان جاری کیا ہے۔
بیان میں غزہ میں 2.2 ملین افراد یعنی تقریباً پوری آبادی قحط کے خطرے سے دوچار ہونے کی طرف توجہ مبذول کراتے ہوئے نشاندہی کی گئی ہے کہ 3 لاکھ 78 ہزار افراد کو غذائی تحفظ کی درجہ بندی کے پیمانے کے مطابق 5 ویں درجے کی فاقی کشی کا سامنا ہے جو کہ بہت خطرناک ہے۔ بیان میں کہا گیا ہے کہ غزہ میں 9 و لاکھ 39 ہزار افراد چوتھے درجے کی فاقہ کشی سے دو چار ہیں جسے ہنگامی سطح کہا جاتا ہے۔بیان میں اس بات پر زور دیا گیا ہے کہ اسرائیلی حملوں کی وجہ سے غزہ میں 19 لاکھ افراد بے گھر ہوئے اور ان میں سے زیادہ ترغیر معیاری کیمپوں میں مقیم ہیں۔