ٹوکیو۔18جنوری (اے پی پی):امریکی سینٹرل کمانڈ نے دعویٰ کیا ہے کہ امریکی افواج نے یمن میں بیلسٹک میزائل تباہ کر دیئے ہیں۔ جاپانی خبررساں ادارے این ایچ کے کے مطابق امریکی سینٹرل کمانڈکی جانب سے جاری بیان میں کہا گیاہے کہ امریکی فوج نے یمنی حُوثیوں کے زیر کنٹرول علاقوں میں فائر کے لئے تیار کیے گئے، 4 بحری جہاز شکن بیلسٹک میزائلوں کو نشانہ بنا کر تباہ کر دیا ہے۔امریکی سینٹرل کمانڈ نے ایک بیان میں بتایا ہے کہ یہ حملہ منگل کی صبح کیا گیا تھا ۔
بیان میں کہا گیا ہے کہ اِن حُوثی میزائلوں سے خطے میں تجارتی اور امریکی نیوی کے بحری جہازوں کے لیے واضح خطرہ تھا۔امریکی میڈیا کے مطابق گزشتہ جمعہ اور ہفتے کی کاررائیوں کے بعد حُوثی اہداف پر یہ تیسرا امریکی حملہ تھا۔امریکی سینٹرل کمانڈ نے یہ اعلان بھی کیا کہ اِس کی بحری افواج نے گزشتہ جمعرات کو ایک بحری جہاز کو قبضے میں لیا تھا جو ایران سے حُوثیوں کے لیے ہتھیاروں کے پرزے لے کر جا رہا تھا۔