اوسلو۔29فروری (اے پی پی):ناروے کے ساحلی شہر برگن میں ہیلی کاپٹر ساحل کے قریب سمندر میں گر کر تباہ ہوگیا، تاہم اس پر سوار تمام 6افراد کو بچا لیا گیا۔ شنہوا نے ناروے کی ریسکیو سروس کے حوالے سے بتایا کہ یہ حادثہ گزشتہ روز ملک کے دوسرے سب سے بڑے شہر برگن کی ساحلی پٹی کے قریب پیش آیا۔ہیلی کاپٹر شام کو تقریباً ساڑھے 7بجے ہنگامی سگنل دینے کے بعد لاپتہ ہو گیا۔
بعد ازاں عینی شاہدین نے مشتبہ حادثے کی جگہ کے قریب لوگوں کو سمندر میں دیکھنے کی اطلاع دی۔ پولیس سمیت حکام کو رات 8 بج کر 11 منٹ پر صورتحال سے آگاہ کر دیاگیا جس پر 2 ایئر ایمبولینسز اور ایک ریسکیو ہیلی کاپٹر امدادی کوششوں کے لیے جائے وقوعہ پر روانہ کر دیا گیاجس کے باعث حادثے کا شکار ہونے والےتمام 6افراد کو زندہ بچا لیا گیا جنہیں طبی امداد کی فراہمی کے لئے ہسپتال منتقل کر دیا ،تاہم ان کی صحت کی حالت نہیں بتائی گئی۔ ایکسیڈنٹ انویسٹی گیشن بورڈ ناروے کے ڈائریکٹر ولیم جے برتھیوسن نے بتایا کہ ان کا ادارہ حادثے کی فوری طور پر تحقیقات شروع کرے گی۔