اسلام آباد: سینیٹ اجلاس ڈپٹی چیئرمین سیدال خان کی زیر صدارت شروع ہو گیا۔
سینیٹ اجلاس کے آغاز میں ارکان کی تعداد 37 تھی جو اجلاس کے دوران بڑھ کر 49 ہو گئی۔ جس میں سے پیپلز پارٹی کے سینیٹرز کی ارکان کی بھی بڑی تعداد موجود ہے۔ چیئرمین سینیٹ کی فائل بھی ایوان میں پہنچا دی گئی۔
پاکستان تحریک انصاف (پی ٹی آئی)، جمعیت علمائے اسلام (جے یو آئی) اور بلوچستان نیشنل پارٹی کے ارکان ایوان میں موجود نہیں ہیں۔
سینیٹ اجلاس میں وقفہ سوالات کو مؤخر کیا گیا۔ سینیٹ میں بینکنگ کمپنیات ترمیمی بل 2024 وفاقی وزیر خزانہ اورنگزیب کی جانب سے پیش کیا گیا۔ جسے منظور کر لیا گیا۔
وفاقی وزیر خزانہ نے کہا کہ اسلامی بینکنگ کی سپورٹ کے لیے لیگل فریم ورک کو زیادہ مستحکم بنایا گیا ہے۔ اور اسٹیٹ بینک کے ریگولیٹری رول کو مستحکم کیا گیا۔ 2008 میں عالمی معاشی بحران میں کئی کمپنیاں ڈوب گئیں۔
انہوں نے کہا کہ خدانخواستہ کوئی فنانشل ادارہ مشکل میں جاتا ہے تو اس حوالے سے اصلاحات کی گئی ہیں۔ اور بنکنگ محتسب کے پاس شکایات کے لیے آسانی پیدا کی گئی ہے۔
سینیٹر دنیش کمار نے کہا کہ ہم مسلسل 5، 6 دنوں سے آ رہے ہیں آج ہی آئینی ترمیم پیش کر دی جائیں۔ اب تو ہمیں کالز آرہی ہیں اور ہمارا نام ترمیم والے رکھ دیا گیا ہے۔
یہ بھی پڑھیں: آئینی ترامیم جمہوریت کیلئے تباہ کن ہیں، علی محمد خان
اس سے قبل پیپلزپارٹی نے اپنے تمام ارکان قومی اسمبلی اور سینیٹ کو 11 بجے تک پارلیمنٹ پہنچنے کی ہدایت کی تھی۔
سینیٹ اجلاس جو 8 بجے شروع ہونا تھا تین گھنٹے کی تاخیر کے بعد رات 11 بجے شروع ہوا۔
مجوزہ 26 ویں آئینی ترامیم کی منظوری کے حوالے سے اجلاس سے قبل پارلیمنٹ ہاؤس کے اطراف سیکیورٹی ہائی الرٹ کر دی گئی۔
ذرائع کے مطابق پنجاب پولیس کے تازہ دم دستے بھی پارلیمنٹ ہاؤس کے باہر پہنچ گئے جو کسی بھی ناگہانی صورتحال سے مکمل طور پر نمٹنے کے لیے تیار ہیں۔