کیلیفورنیا: آرٹیفیشل انٹیلیجنس (اے آئی) کے آنے کے بعد سرچ انجن (گوگل) نے ایک بار پھر بڑی تعداد میں اپنے ملازمین کو نوکری سے فارغ کر دیا۔
غیر ملکی خبر رساں ایجنسی کے مطابق گوگل نے اس بار اپنے انتظامی عہدوں سے لوگوں کو فارغ کر دیا۔ گوگل نے ڈائریکٹر اور نائب صدر سمیت 10 فیصد ملازمین کو نوکری سے فارغ کیا۔
گوگل کے سی ای او سندر پچائی نے ملازمین کی ایک میٹنگ میں 10 فیصد ملازمین کو فارغ کرنے کا اعلان کیا۔
سندر پچائی نے کہا کہ کمپنی کو اوپن اے آئی جیسے حریفوں سے مقابلے کا سامنا ہے۔ اور اس سے نمٹنے کے لیے بہتر کارکردگی کی ضرورت ہے۔
ملازمین اور ذمہ داران کو نوکریوں سے فارغ کرنے کے بعد کمپنی نے کچھ منیجرز کو انفرادی طور پر دوبارہ معاملات سونپ دیئے۔
یہ بھی پڑھیں: فیس بک پر ذاتی ڈیٹا افشا کرنے پر 75 ارب 63کروڑ روپے کا جرمانہ
واضح رہے کہ گزشتہ برس بھی تشکیل نو کے لیے گوگل کی جانب سے انتہائی قدم اٹھایا گیا تھا۔ اور 12 ہزار سے زائد ملازمین کو نوکری سے ہاتھ دھونا پڑا تھا۔
رپورٹ کے مطابق ملازمین کو نوکریوں سے نکالنے کا فیصلہ سی ای او کے وسیع لائحہ عمل کا حصہ ہے۔ جس کو 2022 میں متعارف کرایا گیا تھا۔ جس کا مقصد گوگل کو 20 فیصد مزید بہتر کرنا اور اے آئی پر مشتمل مستقبل کو اپنانا ہے۔