ملک کے مختلف شہروں میں بارش اور پہاڑی علاقوں میں برفباری کی پیشگوئی

محکمہ موسمیات نے ملک کے مختلف شہروں میں بارش اور پہاڑی علاقوں میں برفباری کی پیشگوئی کی ہے۔

محکمہ موسمیات کے مطابق بلوچستان، خیبر پختونخوا، گلگت بلتستان، کشمیر اورملحقہ پہاڑی علاقوں میں بارش اور برفباری کا امکان ہے،پنجاب کے زیادہ ترمیدانی علا قوں اور بالائی سندھ میں درمیانی سے شدید دُھند چھائے رہنے کا امکان ہے۔

اسلام آباد اور گرد و نواح میں موسم سرد اور مطلع جزوی ابر آلود رہنے کے علاوہ ہلکی بارش کا امکان ہے۔

چترال، دیر، سوات، کو ہستان، با جوڑ، خیبر، شانگلہ، بونیر، بٹگرام، مانسہرہ اور ایبٹ آباد میں بارش اور برفباری جبکہ رات کے اوقات میں چند مقامات پر درمیانی سے شدید بارش اور برفباری کی پیشگوئی کی گئی ہے۔ صوابی، مردان، پشاور، نوشہرہ، کوہاٹ، کرک،کرم اور وزیرستان میں ہلکی بارش ہونے کا امکان ہے۔

حکومت اور پی ٹی آئی کے درمیان مذاکرات کا دوسرا دور آج ہوگا

بلوچستان کے بیشتر اضلاع میں موسم سرد اور مطلع ابرآلود رہنے کا امکان ہے تاہم کوئٹہ،چمن، پشین، زیارت، قلعہ عبداللہ، قلعہ سیف اللہ، ژوب، بارکھان، لورالائی، موسیٰ خیل، قلات، پنجگور، تربت، دالبندین اور نوکنڈی میں چند مقامات پر بارش اور برفباری ہونے کی توقع ہے۔

پنجاب کے بیشتر اضلاع میں موسم سرد اور مطلع جزوی ابر آلود رہنے کا امکان ہے۔ راولپنڈی، اٹک، جہلم میں ہلکی بارش جبکہ مری، گلیات اور گرد و نواح میں بھی ہلکی بارش اور برفباری ہونے کی توقع ہے۔

سندھ کے بیشتر اضلاع میں موسم سرد اور خشک رہنے کا امکان ہے۔ رات کے اوقات میں سکھر، شہید بینظیر آباد، شکارپور، کشمور، خیر پور، موہنجوداڑو اور گرد و نواح میں درمیانی سے شدید دھند چھائے رہنے کی پیشگوئی کی گئی ہے۔

محکمہ موسمیات کے مطابق کشمیر اور گلگت بلتستان میں موسم شدید سرد اور مطلع ابر آلود رہنے کے علاوہ بارش اور برفباری ہونے کا امکان ہے۔