پاکستان نے کہا ہے کہ فلسطین پر اُس کی پوزیشن واضح ہے جبکہ غزہ سے شہریوں کی منتقلی کے حوالے سے کسی نے رابطہ کیا اور نہ ہی ایسی کوئی تجویز آئی۔
جمعرات کو اسلام آباد میں دفتر خارجہ کے ترجمان شفقت علی خان نے پریس بریفنگ میں کہا کہ ’پاکستان اسرائیل کی جانب سے سیز فائر معاہدے کی خلاف ورزی کی مذمت کرتا ہے۔‘ترجمان دفتر خارجہ کا کہنا تھا کہ امدادی کاموں کو روکنا معاہدے کی خلاف ورزی ہے، عالمی برادری سیزفائز معاہدے پر عملدرآمد کرائے۔انہوں نے کہا کہ بین الاقوامی برادری اسرائیلی مظالم پر اپنی خاموشی توڑے۔ٹرمپ کے غزہ سے متعلق بیان پر ترجمان دفتر خارجہ نے صحافیوں کے سوالات کے جواب میں کہا کہ فلسطین اور فلسطینییوں کے کاز کی پاکستان نے ہمیشہ سپورٹ کی۔ ’پاکستان کی فلسطین کے حوالے سے پوزیشن واضح ہے، ہم فلسطینیوں کے ساتھ کھڑے ہیں۔‘ترجمان دفتر خارجہ کا کہنا تھا کہ فلسطین، فلسطینیوں کا ہے۔ ’غزہ ہماری بریفنگ کا باقاعدہ حصہ رہا ہے اور قائداعظم کے دور سے ہماری پوزیشن فلسطین پر واضح ہے۔‘انہوں نے کہا کہ پاکستان فلسطینیوں کےحق خودارادیت کی جدوجہد کی حمایت جاری رکھے گا۔ ’غزہ کے عوام کی منتقلی کی تجویز نامنصفانہ، تکلیف دہ اور تشویشناک ہے۔‘ترجمان نے کہا کہ ’غزہ سے شہریوں کی منتقلی کے حوالے سے ہمارے پاس کوئی تجویز یا درخواست نہیں آئی۔ اس حوالے سے یم سے کسی قسم کا رابطہ نہیں کیا گیا۔‘دفتر خارجہ کے ترجمان نے کہا کہ ’ہم فلسطینیوں کی خواہش کے مطابق دو ریاستی حل کے حامی ہیں۔ جو فلسطین کے شہری چاہتے ہیں ہم اس کی حمایت کرتے ہیں۔‘افغانستان کے حوالے سے پاکستان کے دفتر خارجہ کے ترجمان نے کہا کہ غیرقانونی طور پر مقیم افغان شہریوں کو اُن کے ملک واپس بھیجنا قانونی ضرورت ہے۔انہوں نے کہا کہ ’ہم افغانوں کی تیسرے ملک منتقلی کے حوالے سے متعلقہ ممالک سے رابطہ میں ہیں اور یقین ہے راولپنڈی اور اسلام آباد میں 20 لاکھ افغان مقیم نہیں۔‘