پاکستان تحریک انصاف کو 8 فروری کو مینارِ پاکستان پر جلسہ کرنے کی اجازت نہیں مل سکی۔لاہور ہائی کورٹ نے ضلعی انتظامیہ کو ہدایت کی تھی کہ وہ جلسے کرنے کی اجازت کے حوالے سے پی ٹی آئی کی درخواست پر فیصلہ کریں۔تاہم ضلعی انتظامیہ لاہور نے پاکستان تحریک انصاف کی جلسے کی درخواست مسترد کر دی۔
ضلعی انتظامیہ لاہور کی جانب سے جلسے کی اجازت نہ دینے کے فیصلہ کی وجہ امن و امان کی صورتحال کو برقرار رکھنے کو قرار دیا گیا ہے۔
ضلعی انتظامیہ کے مطابق لاہور میں کرکٹ میچ، انٹرنیشنل سپیکر کانفرنس اور ہارس اینڈ کیٹل شو جیسے اہم ایونٹس کا انعقاد ہو رہا ہے۔انتظامیہ کا کہنا ہے کہ مذکورہ ایوینٹس کی وجہ سے سکیورٹی پر پہلے ہی ہزاروں اہلکار تعینات کیے جا چکے ہیں۔ ایسی صورت میں پی ٹی آئی کو جلسے کی اجازت نہیں دی جاسکتی۔قبل ازیں لاہور ہائی کورٹ کے باہر میڈیا سے گفتگو میں چیف آرگنائزر پی ٹی آئی عالیہ حمزہ کا کہنا تھا کہ ہمارا قانونی اور آئینی حق ہے کہ جلسہ کریں۔’ہماری لیگل ٹیم 4 بجے سے ڈی سی آفس میں موجود ہے، ڈی سی آفس میں درخواست 29 جنوری کو دی لیکن عملدرآمد نہیں ہو رہا، اجازت نہ ملی تو اگلے لائحہ عمل کا اعلان کیا جائے گا۔‘خیال رہے کہ پی ٹی آئی نے 8 فروری کو عام انتخابات میں مبینہ دھاندلی کے خلاف ملک بھر میں یوم سیاہ منانے کا اعلان کیا ہے۔اس سلسلے میں مینار پاکستان پر پی ٹی آئی نے جلسے کا بھی اعلان کر رکھا ہے جس کے لیے انتظامیہ کو درخواست دی گئی تھی۔