اسلام آباد: پاکستان رواں مالی سال کے ابتدائی 6 ماہ میں عالمی مالیاتی ادارے (آئی ایم ایف) کی بڑی شرائط پوری کرنے میں کامیاب ہو گیا۔
وزارت خزانہ نے موجودہ مالی سال کے پہلے 6 ماہ کی آمدن و اخراجات کی تفصیلات جاری کر دیں۔ جس کے مطابق پاکستان ابتدائی 6 ماہ میں عالمی مالیاتی ادارے (آئی ایم ایف) کی بڑی شرائط پوری کرنے میں کامیاب ہو گیا ہے۔
رپورٹ کے مطابق 2 ہزار 900 ارب روپے کے ہدف کے مقابلے میں پرائمری سرپلس 3 ہزار 600 ارب روپے تک پہنچ گیا۔ جبکہ چاروں صوبوں نے 750 ارب روپے ہدف کے مقابلے میں 776 ارب روپے سرپلس بجٹ دیا۔ صوبوں نے 376 ارب روپے کا ریونیو ہدف کے مقابلے میں 442 ارب روپے ٹیکس جمع کیا۔
زرعی آمدن پر ٹیکس کے عملدرآمد سے ریونیو میں مزید اضافہ متوقع ہے۔
رپورٹ کے مطابق 6 ماہ میں فیڈرل بورڈ آف ریونیو (ایف بی آر) کو ٹیکس ریونیو میں 384 ارب روپے کا شارٹ فال کا سامنا کرنا پڑا۔ 6 ہزار 9 ارب ہدف کے مقابلے میں 5 ہزار 624 ارب روپے کا ٹیکس جمع کیا گیا۔ تاہم تاجر دوست اسکیم کے تحت 23.4 ارب روپے ٹیکس جمع کرنے کا ہدف پورا نہ ہو سکا۔
یہ بھی پڑھیں: پاکستان معاشی استحکام کی بحالی پر پیشرفت کر رہا ہے ، فچ کی رپورٹ
وفاقی حکومت کی خالص آمدن 5 ہزار 887 ارب روپے رہی۔ اور وفاقی حکومت کے اخراجات 8 ہزار 200 ارب روپے سے تجاوز کر گئے۔ پہلے 6 ماہ میں 2 ہزار 313 ارب روپے کا بجٹ خسارہ ہوا۔
رپورٹ کے مطابق اس دورانیے میں قرضوں پر سود کی مد میں 5 ہزار 141 ارب روپے خرچ کیے گئے۔ اور وفاقی ترقیاتی منصوبوں پر صرف 164 ارب روپے خرچ کیے گئے۔