سہ ملکی ون ڈے سیریز میں پاکستان اور نیوزی لینڈ کے درمیان فائنل میچ میں پاکستان نے ٹاس جیت کر پہلے بیٹنگ کا فیصلہ کیا ہے۔
دونوں ٹیمیں آج کراچی کے نیشنل کرکٹ سٹیڈیم میں آمنے سامنے ہیں۔
یہ میچ دونوں ٹیموں کا آئی سی سی چیمپئنز ٹرافی سے قبل آخری میچ ہے۔
اس میچ میں پاکستانی ٹیم کی قیادت محمد رضوان جبکہ کیوی ٹیم کی کپتانی مچل سینٹنر کر رہے ہیں۔
اس سے قبل پاکستان نے سیریز کے تیسرے میچ میں جنوبی افریقہ کو چھ وکٹوں سے ہرا دیا تھا۔
اسی طرح نیوزی لینڈ نے سیریز کے پہلے اور دوسرے میچ میں بالترتیب پاکستان اور جنوبی افریقہ کو شکست دے کر فائنل میں جگہ بنا لی تھی۔
خیال رہے کہ یہ تین ملکی ون ڈے سیریز آئی سی سی چیمپئنز ٹرافی سے قبل تیاریوں کا حصہ ہے۔
اس میچ کے لیے پاکستانی ٹیم میں ایک تبدیلی کی گئی ہے جس کے بعد فاسٹ بولر محمد حسنین کی جگہ آل راؤنڈر فہیم اشرف کو پلیئنگ الیون کا حصہ بنایا گیا ہے۔
نیوزی لینڈ نے اپنی ٹیم میں دو تبدیلیاں کی ہیں۔ اس میچ کے لیے میٹ ہینری اور بین سیئرز کی جگہ ٹیم میں جیکب ڈَفی اور نیتھن سمتھ کو پلیئنگ الیون میں شامل کیا گیا ہے۔
پاکستان کی پلیئنگ الیون
اس میچ کے لیے پاکستان کی پلیئنگ الیون میں فخر زمان، بابر اعظم، سعود شکیل، محمد رضوان (کپتان، وکٹ کیپر)، سلمان علی آغا، طیب طاہر، خوشدل شاہ، فہیم اشرف، شاہین آفریدی، نسیم شاہ اور ابرار احمد کو شامل کیا گیا ہے۔
نیوزی لینڈ کی پلیئنگ الیون
اس میچ کے لیے نیوزی لینڈ کی پلیئنگ الیون میں وِل ینگ، ڈیوون کونوے، کین ولیمسن، ڈیرل مِچل، ٹام لیتھم (وکٹ کیپر)، گلین فلپس، مائیکل بریسویل، مِچل سینٹنر(کپتان)، نیتھن سمتھ، جیکب ڈفی اور وِل او رورک شامل ہیں۔